ماتديش ثقتك لاي حد

اول ما دخلت الكلية كان اهم حاجة عندي اني اكون صحاب ويمكن دي مشكلة بعانوا منها طلبة شهادات المعادلة لانهم بكونوا سايبين اهلهم وصحابهم وجايين لعالم مايعرفوش عنه حاجة

وفعلا تصاحبت على فتاة زيي شهادة معادلة وكانت كويسة اوي معايا خدنا اوي على بعض وبقينا نروح كل حتة سوا ونذاكر سوا وننام عند بعض

وبعدين حبينا نعمل شلة كاملة عشان مانبقاش لوحدنا

وتعرفنا ببنتين معادلة برضه زينا ومحترمات اوي ومحجبات وكل حاجة

واحدة منهم دخلت قلبي اوي وكانت الحاجات المشتركة بيني وبينها بتقربنا اكتر واكتر

للاسف كانت ثقتنا مش في محلها خالص

البنت التانية غارت جدا مني وحسبتني حخطف صاحبتها مني راحت وقعت بيني وبين صاحبتي الاولانية وقالتلها عني كلام وحش اوي

وماكتفتش بكدة راحت نشرت السمعة دي لاصدقائها من الشباب مع اني ماكنتش اعرف انها تعرفهم بس دي غلطتي

اديت ثقتي كاملة لواحدة معرفهاش مجرد لاندفاع عاطفي وخسرت كل حاجة

الحمد لله الحاجة الوحيدة اللي ربنا ستر فيها هيه صاحبتي الاولانية مصدقتش ولا كلمة عني ووقفت جنبي

ومع ذلك دايما بيظهر الحق في الاخر وانا متأكدة ان حقيقتي حتظهر للناس مرة تانية